Humanisttalaš seremoniijat
Nammafeasta
Okta eallima stuorámus dáhpáhusain lea go mánná boahtá máilbmái. Humanisttalaš nammafeasta ávvuda ahte mánná lea riegádan, lea ožžon nama ja šaddan oassin min servodagas.
Min nammafeasta lea seremoniija mas lea musihkka, sárdni ja searvevuohta. Váhnemat, bearaš ja guossit ožžot liibba ávvudit máná ja guorahallat maid mearkkaša go mánná lea boahtán sin eallimii.
Seremoniija bistá vuollelaš diimmu ja lágiduvvo heivvolaš báikkis lagas birrasis. Dávjá lágiduvvo seremoniija ráđđeviesus, kulturviesus dahje servodatviesus. It dárbbaš leat miellahttu válljet humanisttalaš nammafeastta.
Mii oažžut olu buriid máhcahagaid váhnemiin geat leat válljen nammafeastta. Okta váhnen govvidii vásáhusa ná: “Seremoniijajođiheaddji lea hirbmat čeahppi astat dearvvahit buot mánáid. Juohke mánná áicojuvvui ja biddjojuvvui guovddážii. Hirbmat buorre seremoniija!”
Nammafeastta dieđihanskovvi lea oažžumis dušše dárogillii. Jus dárbbašat veahki dieđihemiin, de sáhtát váldit oktavuođa e-boastta bokte: [email protected].
Konfirmašuvdna
Konfirmašuvdna lea vejolašvuohta nuoraide gávnnahit maid sii áigot ovddastit, ja mii lea deaŧalaš sidjiide.
Dan sii dahket kurssa bokte, mii earret eará váldá ovdan fáttáid humanismma, identitehta ja kritihkalaš jurddašeami.
Humanisttalaš konfirmašuvnnas leat guokte oasi: Konfirmašuvdnakursa ja konfirmašuvdnaseremoniija
Konfirmašuvdnakursa movttiidahttá iešheanalaš jurddašeapmái ja ehtalaš čuolmmaid guorahallamii. Kurssas váldojit ovdan olu gažaldagat mat leat deaŧalaččat árgabeaivvis, muhto maiddái gažaldagat máilmmi birra. Dávjá dat čatnasit oktii.
Mii movttiidahttit konfirmánttaid oassálastit aktiivvalaččat, ja geahččat iežas ja earáid miellaguottuid kritihkalaččat. Deaŧalaš fáttát kurssas leat humanisma, kritihkalaš jurddašeapmi, olmmošvuoigatvuođat, etihkka ja identitehta. Dasa lassin digaštallojit fáttát maidda konfirmánttain alddiineaset lea beroštupmi.
Konfirmašuvdnaseremoniija lea kurssa árvvolaš loahpaheapmi ja ávvudeapmi. Konfirmánttat leat guovddážis ja seremoniijii bovdejuvvojit bearaš ja skihpárat. Seremoniija sisttisdoallá iešguđetlágan kultuvrralaš dáhpáhusaid nugo musihka, diktalohkama ja lávluma. Sierra bovdejuvvon guossi doallá sártni konfirmánttaide.
Juohke konfirmántta namma almmuhuvvo go oažžu kursaduođaštusa. Dávjá leat maiddái dearvvuođat konfirmánttaid bealis.
Seremoniijat lágiduvvojit dávjá almmolaš ja árvvolaš báikkis nugo kulturviesus, ráđđeviesus dahje feastasálas.
Konfirmašuvnna dieđihanskovvi lea oažžumis dušše dárogillii. Jus dárbbašat veahki dieđiheapmái, de sáhtát váldit oktavuođa e-boastta bokte: [email protected].
Vihaheapmi
Humanisttalaš vihaheapmi lea čáppa ja hávskes seremoniija mii ávvuda ja duođašta ahte guokte olbmo leaba válljen goabbat guoimmiska.
Vuolggasadjin lea bárra ieš ja dat humanisttalaš árvvut maidda soai háliideaba hukset iežaska ovttaseallima – ráhkisvuohta, dásseárvu ja guovttebealat árvvusatnin. Seremoniija lea čadnon eallinoaidnohumanismii.
Seremoniija sisdoallu lea dábálaččat musihkka, diktalohkan ja lávlun, ja dasa lassin vihaheaddji sárdni bárrii. Sisdoallu lea iešguđetlágan, bára sávaldaga mielde. Muhto buot seremoniijain lea dat stuorimus dáhpáhus: Ieš náitaleapmi.
Seremoniija heivehuvvo juohke bárrii. Bárra ja vihaheaddji deaivvadit plánet seremoniija, ja ságastallet vai vihaheaddji oažžu evttohusaid sárdnái.
Vihaheapmi sáhttá lágiduvvot sihke siste ja olgun. Seremoniijabáiki ferte heivet árvvolaš ja allamenolaš seremoniijii.
Humanehtalaš lihtus lea vihahanriekti miehtá Norgga, ja dat mearkkaša ahte bárra buori muddui mearrida gos seremoniija galgá dollojuvvot.
Vihaheami diŋgonskovvi lea oažžumis dušše dárogillii. Jus dárbbašat veahki dieđihemiin, de sáhtát váldit oktavuođa e-boastta bokte: [email protected].
Hávdádeapmi
Humanisttalaš hávdádeapmi, dahje hávdái mieđušteapmi, lea allamenolaš seremoniija mas oamehas biddjojuvvo guovddážii čáppa vuogi mielde. Buohkat geat háliidit, sáhttet válljet Humanisttalaš hávdádeami.
Humanisttalaš hávdádeapmi lea árvvolaš ja allamenolaš čalmmustahttin man vuođđun leat humanisttalaš árvvut. Mii veahkehit du, gii leat oapmahaš, ráhkadit čáppa rámma mas leat elemeanttat nugo musihkka, muitosárdni, diktalohkan, lávlun ja muitosánit. Min hávdádansárdnedoallit leat humanisttat geaid Humanehtalaš lihtus lea oahpahan ja kvaliteahtasihkkarastán.
Jus háliidat Humanisttalaš hávdádeami, de lea dutnje álkimus dieđihit hávdádusfitnodahkii, mii dasto váldá minguin oktavuođa. Sárdnedoalli veahkeha áinnas hutkat heivvolaš dáhpáhusaid buori seremoniijii. Sárdnedoalli bargu lea ovttasbargat oapmahaččaiguin ja hávdádanfitnodagain ja váldit ovddasvástádusa seremoniija jođiheamis.
Jus leat gažaldagat dahje dárbbašat veahki, de sáhtát riŋget telefovdnanummarii 23 15 60 00 dahje čállit e-boastta: [email protected]